Një gjykatëse federale ka urdhëruar administratën amerikane të ndalojë kërcënimin e zyrtarëve lokalë dhe shtetërorë të zgjedhjeve me akuza penale për mënyrën se si i trajtojnë fletëvotimet.
Gjykatësja në Kaliforni vendosi që Departamenti i Drejtësisë (DoJ) të mos u kërkojë më zyrtarëve zgjedhorë të veçojnë apo të mos përpunojnë fletëvotime për të cilat administrata e presidentit Donald Trump pretendon se mund t’u përkasin personave që nuk janë shtetas amerikanë.
Vendimi vjen vetëm pak ditë para zgjedhjeve të mesmandatit, të cilat do të përcaktojnë se cila parti politike do të kontrollojë Kongresin amerikan gjatë dy viteve të fundit të presidencës së Trumpit, transmeton Telegrafi.
Presidenti e kritikoi vendimin të shtunën, duke shkruar: “Pse do ta refuzonin korrigjimin e mashtrimit zgjedhor?”
Në fillim të këtij muaji, Departamenti i Drejtësisë u dërgoi letra sekretarit të shtetit të Kalifornisë dhe zyrës së regjistrimit të votuesve në Los Angeles, duke kërkuar që të veçoheshin fletëvotimet e 20 mijë votuesve të regjistruar, të cilët administrata Trump pretendonte se me gjasë nuk ishin shtetas amerikanë.
Rreth një javë më vonë, zyrtarë të armatosur të Departamentit të Sigurisë Kombëtare ua dorëzuan letra autoriteteve dhe punonjësve të qarqeve në Kaliforni, duke i kërcënuar me ndjekje penale nëse nuk i veçonin këto fletëvotime.
Megjithatë, autoritetet lokale thanë se nuk mund t’i zbatonin kërkesat, pasi ishin të detyruara të ndiqnin procedurat zgjedhore të përcaktuara nga ligjet shtetërore dhe federale. Një gjykatëse e rrëzoi kërkesën, duke paralajmëruar se zbatimi i saj do të shkaktonte “kaos” në procesin zgjedhor.
Në të njëjtën periudhë, Departamenti i Drejtësisë nisi një hetim penal ndaj zyrtarëve zgjedhorë të qarqeve dhe lëshoi fletëthirrje nga një juri e madhe federale.
Organizatat për të drejtat civile dhe sindikatat që përfaqësojnë punonjësit zgjedhorë paraqitën një ankesë ligjore, duke akuzuar Departamentin e Drejtësisë për ndërhyrje në punën e tyre. Në përgjigje, gjykatësja Trina Thompson urdhëroi administratën të ndalonte veprimet e tilla.
“Megjithëse të paditurit pretendojnë se veprimet e tyre synojnë të ndalojnë votimin e paligjshëm nga personat që nuk janë shtetas, këto veprime ka të ngjarë të ndërhyjnë në administrimin e zgjedhjeve dhe t’u mohojnë të drejtën e votës qytetarëve që kanë të drejtë të votojnë”, shkroi gjykatësja Thompson.
Sipas vendimit të saj, administrata Trump kishte dërguar një letër të ngjashme edhe në shtetin e Uashingtonit, duke i kërkuar sekretarit të shtetit që të ndalonte përpunimin e fletëvotimeve të votuesve që dyshohej se nuk ishin shtetas amerikanë.
Këto veprime janë pjesë e një fushate shumëvjeçare të Trumpit dhe administratës së tij kundër mashtrimeve të pretenduara zgjedhore, të cilat presidenti i konsideron të përhapura, ndonëse studimet tregojnë se raste të tilla janë jashtëzakonisht të rralla.
Para zgjedhjeve të mesmandatit, të planifikuara për 3 nëntor, Trump ka vënë në pikëpyetje sigurinë e procesit zgjedhor, duke pretenduar se ka mashtrime të përhapura me votimin përmes postës dhe pjesëmarrjen e personave që nuk janë shtetas amerikanë. Ai gjithashtu ka ofruar një shpërblim prej një milion dollarësh për personat që raportojnë raste të mashtrimit zgjedhor në SHBA dhe që çojnë në dënime.
Megjithatë, të dhënat tregojnë se raste të tilla janë të rralla. Sipas një verifikimi të BBC-së, baza e të dhënave e organizatës Heritage Foundation identifikoi vetëm 24 raste të personave që nuk janë shtetas amerikanë dhe që janë dënuar për votim të paligjshëm gjatë periudhës 2005–2025.
Në reagimin e tij të së shtunës, Trump kritikoi edhe vendimet e tjera gjyqësore kundër administratës së tij lidhur me pretendimet për mashtrime të mundshme zgjedhore, duke u zotuar se do të vazhdojë luftën për “integritetin e zgjedhjeve”. /Telegrafi/