Organizata humanitare “Jetimat e Ballkanit” do të inaugurojë nesër një mega-projekt në qytetin e Gjilanit, duke zgjeruar kështu veprimtarinë e saj në mbështetje të kategorive në nevojë.
Lajmin e ka bërë të ditur humanisti Halil Kastrati, i cili njoftoi se ceremonia e hapjes do të mbahet nesër në ora 11:00, në Sallën e Teatrit në Gjilan.
Projekti përfshin tri iniciativa të rëndësishme sociale: një qendrim ditor për të moshuarit, një kuzhinë humanitare dhe një bujtinë për studentë. Sipas organizatorëve, kjo hapësirë synon të ofrojë mbështetje të drejtpërdrejtë për kategori të ndryshme të shoqërisë, duke krijuar një ambient solidariteti dhe përkujdesjeje.
Qendrimi ditor do të shërbejë si hapësirë për socializim dhe përkujdesje për të moshuarit, kuzhina humanitare do të ofrojë ushqim për familjet dhe individët në nevojë, ndërsa bujtina për studentë do të sigurojë akomodim për të rinjtë që ndjekin studimet.
Organizatorët kanë shprehur mirënjohje për të gjithë bamirësit që kontribuuan në realizimin e këtij projekti, duke theksuar se mbështetja e komunitetit ka qenë vendimtare për ta kthyer këtë nismë në realitet.
Ceremonia e hapjes pritet të mbledhë qytetarë, përfaqësues institucionalë dhe mbështetës të organizatës, në një ngjarje që synon të shënojë një hap të rëndësishëm në fuqizimin e solidaritetit social në Gjilan.
