Ballina Lajme nacionale Zhvillime të reja në rastin e 9 vjeçarit nga Fushë Kosova i...

Zhvillime të reja në rastin e 9 vjeçarit nga Fushë Kosova i cili u privua nga jeta

40
SHPËRNDAJE

Rasti i 9 vjeҫarit nga Fushë Kosova ishte rasti që tronditi të gjithë.

Dy prokurorë janë vënë nën llupën e organeve të hetuesisë kosovare me arsyetimin se mund të kenë keqpërdorur detyrën zyrtare.

Bëhet fjalë për neglizhencë në punë në rastin e vdekjes së fëmijës 9-vjeçar, K.Veseli, nga Fushë Kosova.

Këtë rast janë duke e hetuar pesë prokurorë të në dy panele të ndara.

Mësohet se prokurorët që po hetohen janë Ruhan Salihu e Raze Loshaj.

Të dy këta kanë refuzuar të deklarohen.

Kanë kaluar më shumë se një muaj kur në mënyrë të rëndë u privua nga jeta K.Veseli, 9-vjeçar, nga komuna e Fushës Kosovës.

Humbja e të miturit u konsiderua si ndër më të rëndat që kanë ndodhur në Kosovë.

Ai dyshohet se u keqpërdor, e pastaj u godit me mjete të forta nga një 19-vjeçar, po ashtu nga Fushë Kosova.

Para se të privohet nga jeta, 9-vjeçari ishte keqpërdorur tri herë nga i dyshuari.

Në dy rastet, Veseli bashkë me nenën t tij, Makfiren, rastin e kishin raportuar në polici. Por, asgjë nuk ishte bërë për të dyshuarin (S.Osmani 19-vjeçar, i cili tashmë gjendet në qeli).

Policia ishte mjaftuar me një kallëzim penal ndaj 19-vjeçarit i cili ishte ngritur në prillin e këtij viti.

Por, viktima, K.Veseli 9-vjeçar, u privua nga jeta pikërisht nga Osmani ndaj të cilit ishte ngritur kallëzim por që po shëtitej i lirë në Fushë Kosovë.

Duke i parë të gjitha këto rrethana, hetime për rastin se si është trajtuar nga ana e institucioneve hetimore, përveç Inspektoriatit Policor, tashmë ka nisur edhe Këshilli Prokurorial i Kosovës.

Për këtë rast, sipas burimeve të Express, po hetohen dy prokurorë.

Bëhet fjalë për prokurorin Ruhan Salihu e prokuroren Raze Loshaj.

Të dy këta janë duke u hetuar për veprimet që i kanë ndërmarrë për këtë rast.

Janë pesë prokurorë të Kosovës të cilët po mbledhin fakte rreth mënyrës se si Loshaj e Salihu janë marrë me rastin.

Mirëpo, nga ana e Këshillit Prokuorial të Kosovës nuk kanë dhënë detaje rreth emrave të këtyre dy prokurorëve.

Por, kryetari i këtij Këshilli, Bahri Hyseni, ia konfirmoi gazetës se janë formuar panelet për ta hetuar nëse ka pasur neglizhencë për këtë rast.

“Janë formuar komisionet hetimore. Hetimet do të marrin kohë. Ndoshta më shumë se dy muaj. Janë duke u mbledhur të gjitha informacionet se si është trajtuar ky rast.

E ndërkohë, Gazeta i ka kontaktuar të dy prokurorët, Saliun e Loshajn. Por, asnjëri nga ta nuk kanë dashur që të prononcohen për gazetën edhe pse janë pyetur për rastin.

“Nuk dua të deklarohem. Thirreni zëdhënësin”, i tha Salihu gazetës. Ndërkohë Loshaj, tha se është në një gjykim dhe se nuk mund të flas për rastin.

“Jam në gjykim. Nuk kam aspak të bëjë me këtë rast”, ka deklaruar shkurt Loshaj duke mos dashur që t’u përgjigjet pyetjeve të gazetës.

E ndërkohë, hetime për këtë rast përveç Inspektoratit Policor e Këshillit Prokurorial ka nisur edhe zyra e Avokatit të Popullit.

“Inspektorati Policor i Kosovës me të pranuar informacionin lidhur me rastin e vdekjes së dyshimtë të të miturit nga Fushë Kosova, menjëherë ka filluar grumbullimin, shqyrtimin dhe verifikimin e informacioneve lidhur me këtë rast. Varësisht nga gjetjet, IPK-ja do të ndërmarrë veprime bazuar në mandatin e saj”, kanë deklaruar kohë më parë zyrtarë të Inspektoratit Policor të Kosovës.

K.V., i mituri nga Fushë Kosova, u gjet pa shenja jete para një banese më 11 korrik.

Sipas familjes së tij, ai ishte keqpërdorur vazhdimisht nga S.O., i dyshuar që po mbahet në ndalim nën dyshimin se ka kryer veprën penale.

-----