Ditën e sotme kombëtarja ka zhvilluar stërvitje në Kazakistan, ku janë impenjuar lojtarët që luajtën pak minuta dhe ata që nuk u aktivizuan asnjë minutë dje.
Lojtarët titullarë janë lënë pushim, teksa raportohet shqetësuese gjendja fizike e Amir Abrashit, i cili ka pësuar një dëmtim në kavilje në sfidën e djeshme dhe është në dyshim për ndeshjen e pas dy ditëve ndaj Lituanisë.
POSTIMI I FSHF:
Kombëtarja ka zhvilluar një seancë të lehtë stërvitore një ditë pas ndeshjes me Kazakistanin. Nën drejtimin e trajnerit Edoardo Reja të gjithë lojtarët që nuk u aktivizuan zbritën në fushën e blertë.
Ndërsa lojtarët që ishin titullarë ndaj Kazakistanit nuk morën pjesë në këtë seancë, që u zhvillua në qendrën stërvitore të klubit kazak FC Kairat.
Stërvitja zgjati rreth një orë dhe lojtarët u impenjuan vetëm në ushtrime me topin, pa ngarkesa fizike.
Zyra e shtypit në FSHF bën me dije se gjendja e futbollistëve është e mirë dhe nuk ka probleme fizike me përjashtim të Amir Abrashit, i cili pësoi një dëmtim në kavilje gjatë ndeshjes së të dielës dhe u zëvendësua.
Mesfushori është nën vëzhgimin e stafit mjekësor dhe mbetet ende në dyshim për duelin e radhës ndaj Lituanisë. Vendimi do të merret në stërvitjen zyrtare para duelit të së mërkurës.
