Ballina Lajme nacionale Protesta/ Dom Gjergji këshillon Bashën: Jo dhunë, por zgjidh arsyen!

Protesta/ Dom Gjergji këshillon Bashën: Jo dhunë, por zgjidh arsyen!

48
SHPËRNDAJE
- Sponsor gjeneral -

PPërmes një deklarate në rrjetin social facebook, Dioqeza Rrëshen që drejtohet nga Dom Gjergj Meta kërkon që të mbahet ne mendja arsyeja, sepse dhuna është kundër arsyes e shpirtit të njeriut. Dhunë është shprehje e dobësisë, thotë Dom Gjergji në postimin e tij.

Ja postimi i plotë në facebook:

Unë, ne këto ditë të vështira, kam një porosi për vëllezërit e motrat e mi të një gjaku. Dhuna është kundër arsyes e kundër shpirtit të njeriut. Dhuna është shprehje e një dobësie, është shfaqja e një instinkti të errët e të fshehur kushedi se ku e për kushedi se çfarë. Çka e fisnikëron njeriun është vetëm kërkimi i paqes për vete dhe për të tjerët, për familjen e tij e për familjet e të tjerëve, për kombin e tij e për kombin e të tjerëve. Mbi dhunën nuk ndërtohet asgjë e mirë, mbi poshtërimin apo sundimin e tjetrit nuk mund të lindë një rend i mirë dhe i jetueshëm për të gjithë.

Dhuna është e keqe dhe ajo është e kundërta e së mirës dhe e të së bukurës. Më kujtohen fjalët e një kënge italiane që thotë: prima di sparare pensa – para se të qëllosh mendo. Dhuna i përket të paarsyeshmes, botës së kafshëve, por jo njeriut që Zoti e ka pajisur me arsye e me dashuri.

Rruga e dhunës është e shkurtër, nganjëherë duket sikur zgjidh gjithçka dhe menjëherë, por bishti i saj është i gjatë e zvarritet për një kohë të gjatë, si bishti i një përbindëshi mitologjik që shkatërron gjithçka që gjen përpara.

Rruga e paqes është e gjatë dhe e mundimshme, por shpërblen. Nuk është e vërtetë shprehja që thotë: nëse do paqen përgatit luftën!

Nëse do paqen përgatit paqen!

Nuk është e vërtetë se çdo kalim apo çdo ndryshim bëhet me dhunë e me konflikt. Jo! Nuk është  e vërtetë!

Çfarë duam të vendosim në themel të rritjes, ndryshimit dhe progresit të vendit tonë? Dhunën apo dialogun? Si duam t’i jetojmë ditët tona e çfarë duam t’u lëmë fëmijëve: qetësinë dhe paqen që vjen nga dialogu apo pasigurinë që prodhon dhuna?

Përpara nesh të gjithëve në këto momente është sfida e madhe e kërkimit të paqes dhe dialogut ndërmjet kundërshtarësh dhe me njëri-tjetrin.

Dhuna nuk sjell ndryshimin e kërkuar. Nuk e solli dhuna që përdorën komunistët pas luftës së dytë botërore e nuk do të vijë as tani nëse ia besojmë jetën dhe zgjedhjet tona dhunës.

Të mendojmë përpara, të ulemi e të shikojmë në sy fëmijët tanë, adoleshentët dhe të moshuarit tanë. Para se të marrim vendimet tona t’i shikojmë ato drejt e në sy. Kanë një fjalë e një mesazh për të na dhënë: jo dhunës, jo nxitjes së saj, jo arrogancës, jo cinizmit, jo gjuhës helmuese dhe përçmuese.

Duam një Shqipëri të paqtë!

---- ----
-----