Ballina Lajme nacionale Policët neglizhuan rastin e 9 vjeçarit nga Fushë Kosova, nisin hetimet ndaj...

Policët neglizhuan rastin e 9 vjeçarit nga Fushë Kosova, nisin hetimet ndaj tyre

22
SHPËRNDAJE

Ishte mjaftë tronditës lajmi për humbjen e jetës së 9 vjeçarit.

Një 9 vjeçar i komunitetit rom u gjet i vdekur para një jave në Fushë Kosovë.

Ai dyshohet se u dhunua e më pas u privua nga jeta brutalisht nga i dyshuari 20-vjeçar që u prangos më pas nga Policia e Kosovës.

Institucioni i Policisë në këtë rast u akuzua për neglizhencë, pasi që sipas familjarëve ata e kishin paraqitur në polici edhe më herët personin që dyshohet se e kreu veprën.

Lidhur me këto pretendime, tashmë Inspektorati Policor i Kosovës veç se ka nisur hetimet.

IPK kanë bërë të ditur se kanë nisur me grumbullimin e provave dhe informacioneve lidhur me këtë rast.

Nga Inspektorati Policor thonë se varësisht nga të gjeturat, IPK do të ndërmarrë veprime bazuar në mandatin e saj.

“Inspektorati Policor i Kosovës me të pranuar informacionin lidhur me rastin e vdekjes së dyshimtë të të miturit nga Fushë Kosova, menjëherë ka filluar grumbullimin, shqyrtimin dhe verifikimin e informacioneve lidhur me këtë rast. Varësisht nga të gjeturat IPK do të ndërmarrë veprime bazuar në mandatin e saj”, thuhet në përgjigjen e IPK-së.

Megjithatë, nga Policia e Kosovës kanë mohuar të ketë pasur neglizhencë në trajtimin e rastit.

Në një konferencë për media, nga ky institucion është thënë se viktima është dërguar në strehimore, mirëpo se i njëjti ka ikur nga aty.

Për rastin ka folur sot edhe kryeministri i vendit, Ramush Haradinaj.

Ai i ka dalur në mbrojtje Policisë së Kosovës, teksa ka thënë se të njëjtit po ballafaqohen me shumë punë, mirëpo se e kanë shtuar angazhimin e tyre.

Ndërkaq, Gjykata Themelore në Prishtinë i ka caktuar sot 30 ditë ndalim të dyshuarit për rastin.

-----