Ballina Lajme nacionale Mustafa synon ta marrë pushetin duke u bashkuar me opozitën, me LDK...

Mustafa synon ta marrë pushetin duke u bashkuar me opozitën, me LDK në krye të Qeverisë

16
SHPËRNDAJE

LDK po synon të bëhet partia me e madhe në vend duke pretenduar ta marrë pushtetin bashkë me partitë e opozitës.

Lideri i Lidhjes Demokratike të Kosovës, Isa Mustafa, ka thënë se Kosovës, si kurrë më parë, i nevojitet Qeveri e formuar nga partitë e tanishme të opozitës, e drejtuar nga LDK si parti më e madhe në vend.

Ai përmes një postimi në Facebook ka shkruar se, rrëzimi sa më i shpejtë i koalicionit PAN e ka kuptimin e vet, në qoftë se pas kësaj ndodhin ndryshime përmbajtjesore në strukturën dhe përmbajtjen e qeverisjes së vendit.

“Na duhet një qeveri që do ta drejtojë vendin më shumë se një mandat, me partnerë që i qëndrojnë besnik marrëveshjes”, ka shkruar ai.

Sipas Mustafës, ka arsye të mëdha për Kosovën që atë ta qeverisë LDK-ja.

“Në më pak se tre vjet të qeverisjes për herë të parë pas luftës, ia dham drejtimin zhvillimit ekonomik të vendit, luftuam krimin dhe korrupsionin, stabilizuam buxhetin, avancuam marrëdhëniet me BE-në dhe me SHBA-të, filluam ç’kapjen e doganave, administratës tatimore dhe organeve tjera vitale për vendin, plotësuam 94 nga 95 kriteret për liberalizim të vizave”, ka shkruar ai.

Ai thotë se, koalicioni që erdhi pas tyre, e gjeti shtetin mjaft të konsoliduar por rrënoi çdo gjë.

“Prandaj duhet të punojmë dhe të organizohemi që në të ardhmen të mos na rrënojnë rrënuesit”, ka shkruar tutje ai.

Ai ka thënë se Qeveria duhet të bëhet, para së gjithash mbi bazën e vlerësimeve dhe gjykimeve të thella, me njerëz që kryejnë punë për Kosovën, që e ruajnë shtetin e Kosovës dhe territorin e saj, që nuk janë të shantazhuar dhe të korruptuar.

Mustafa shton se Kosovës i nevojitet thellim i partneritetit me ndërkombëtarët, mbi baza të vlerave që vlejnë për ata dhe për Kosovën.

-----