Ballina Lajme nacionale Kurti reagon pas deklaratës së SHBA-së për shkëmbimin e territoreve dhe taksën

Kurti reagon pas deklaratës së SHBA-së për shkëmbimin e territoreve dhe taksën

36
SHPËRNDAJE

Qeveria në detyrë e Kosovës reagoi pas deklaratës së zyrtarëve amerikanë, që informuan se nuk ekziston një plan sekret për shkëmbim territoresh me Serbinë.

Në deklaratë thuhet se sërish, presidenti Hashim Thaçi dhe ai serb Aleksanar Vuçiç mbeten kërcënim për vendin.

Reagimi vjen pas deklaratës së përbashkët nga dërguari i posaçëm presidencial, Richard Grenell, përfaqësuesi i posaçëm për Ballkanin Perëndimor, Mattheë Palmer, dhe ambasadori amerikan, Philip Kosnett, si rikonfirmim se Shtetet e Bashkuara të Amerikës do të vazhdojnë të jenë pranë popullit të Kosovës, dhe se ato mbështesin angazhimin e institucioneve tona shëndetësore për tejkalimin e situatës me COVID-19.

“Kjo paraqet një mbështetje dhe inkurajim për Qeverinë në detyrë. Por, për ne thirrjet e vazhdueshme të Presidentëve Thaçi dhe Vuçiç (korrigjim kufijsh me kompromis të dhimbshëm, veriu si dhuratë e Rankoviqit, razgraničenje, etj.) vazhdojnë të jenë kërcënim, dhe që nga gushti i vitit 2018, ato janë përsëritur nga dy presidentët të cilët kanë vendosur lidhje të shkurtër me njëri-tjetrin pa ndërmjetësim ndërkombëtar”, thuhet në komunikatë.

Sa i përket taksës, thuhet se me heqjen e tarifës për lëndën e parë është bërë një hap i rëndësishëm, ndërsa dialogu thuhet se duhet të udhëhiqet nga Qeveria.

“Dialogu në mes të Kosovës dhe Serbisë duhet të udhëhiqet nga Qeveria, përkatësisht Kryeministri i Republikës së Kosovës, sipas parimeve kushtetuese të Republikës së Kosovës. Dialogu duhet të rifillojë i përgatitur mirë, të ketë qëllim njohjen e ndërsjelltë si dy shtete sovrane dhe me integritet territorial, për marrëveshje të qëndrueshme si garant për normalizim të marrëdhënieve bilaterale dhe paqe e siguri në rajon”.

 

-----