Ballina Lajme Bota/Rajoni Kroacia zgjat periudhën e izolimit, gati plani për të lehtësuar masat

Kroacia zgjat periudhën e izolimit, gati plani për të lehtësuar masat

96
SHPËRNDAJE

Kroacia ka vendosur që të zgjasë periudhën e izolimit edhe për 15 ditë. Ministri i Brendshëm Davor Bozhinoviç u shpreh se qeveria po shikon nëse është e mundshme që të lehtësojë gradualisht disa masa për qarkullim.

Një muaj më herët, qeveria mbylli të gjitha kafenetë, shkollat e transportin publik duke lënë të hapur vetëm farmacitë e dyqanet ushqimore dhe stacionet e benzinës.

Kroatët ishin të lejuar të dilnin nga shtëpitë vetëm për të blerë gjëra esenciale apo medikamente, por jo në grupe. Shumë njerëz kanë punuar nga shtëpia.

Deri tani janë regjistruar 1832 raste me Covid-19 në Kroaci, me 39 persona që kanë vdekur. Të shtunën, numri i rasteve u rrit për 18, që paraqet rritjen më të ulët që nga rasti i parë i regjistruar më 17 mars.

Numri i rasteve të reja ka shënuar rënie së fundmi, me 50 raste të reja të enjten, e 23 të premten. Të dielën e shkuar, autoritetet njoftuan për 66 raste të reja.

“Kemi vendosur të zgjasim periudhën e izolimit edhe për 15 ditë, deri më 4 maj”, ka thënë Bozhinoviç.

Ai ka thënë se qeveria po mendon të lehtësojë disa masa për të ndihmuar ekonominë, por në të njëjtën kohë të vazhdohet me kujdesin ndaj shëndetit të qytetarëve.

Një nga masat që pritet të merret është lejimi i daljes nga shtëpitë, por udhëtimi do të mundësohej vetëm brenda rajoneve të caktuara, brenda shtetit.

-----