Ballina Lajme nacionale Elseid Hysaj nuk do jetë vetëm, një tjetër shqiptar mbërrin te Napoli...

Elseid Hysaj nuk do jetë vetëm, një tjetër shqiptar mbërrin te Napoli për 14 milionë euro

21
SHPËRNDAJE

Mbrojtësi kosovar, Amir Rrahmani do t’i bashkohet Napolit sapo të përfundojë sezoni. Lojtari i Veronës është blerë nga Napoli në muajin janar për 14 milionë euro. Sipas gazetës prestigjioze italiane “Corriere dello Sport”, Rrahmani po pret me padurim të veshë fanellën blu, ndonëse vijon ta cilësojë klubin e Veronës si një klub ambicioz pa të cilin nuk do të mund të ishte pikasur dot në fushë.

“Kur mbërrita këtu kisha vetëm një objektiv: të kuptoja kufijtë e mi, deri ku mund të arrija. Interesimi i Veronës ishte i papritur, unë isha në bisedime me klube të tjera të huaja, por para mundësisë për të ardhur në Itali lashë mënjanë të gjitha opsionet e tjera. Vetëm Seria A do të mund më tregonte realisht se çfarë vlere kisha në të vërtetë”, thotë mbrojtësi kosovar.

“Propozimi i Napolit nuk ma ndryshoi qëndrimin. Kur erdhi oferta, fola menjëherë me trajnerin Juric. Ai donte të fliste me mua, më tha që nëse unë pranoja, do të më duhej ta garantoja dhe t’i premtoja të njëjtin rendiment. Mendoj se jam treguar njeri i besës”, shprehet Rrahmani.

“Unë njoh vetëm një mënyrë sjelljeje, profesionalizmin, i cili pa dyshim përfshin shumë angazhim. Kam kaluar shumë kohë këtu dhe ditën që do të largohem dëshiroj të them lamtumirë në mënyrën e duhur. Jam profesionist dhe më është dhënë mundësia për të luajtur në një klub që ka ambicien për t’i shkuar në fund të gjitha garave. Është një mundësi që e pranova me kënaqësi, por pa harruar se kush më lejoi që të mund ta shfrytëzoja atë”, përfundon futbollisti.

 

-----