Ballina Lajme nacionale “Ata që i kanë hipur kalit mbrapsht dhe ata që i zbritën...

“Ata që i kanë hipur kalit mbrapsht dhe ata që i zbritën kalit po…”, Patozi ftesë për 30 qershorin!

20
SHPËRNDAJE

Ashtu siç ka folur kryeministri Edi Rama gjatë fushatës me termin “ATA” në thelb të diskursit të tij politik dhe Lulzim Basha nga selia blu, teksa sulmonin njëri-tjetrin, ka zgjedhur të flasë edhe kreu i Bindjes Demokratike, Astrit Patozi.

Në një postim në Facebook, katër ditë para zgjedhjeve të 30 qershorit, Patozi duke ju drejtuar me “ATA” palëve, kërkon që të votohet BD-ja të dielën si e vetmja alternativë përballë korrupsionit dhe arrogancës së “Rilindjes”.

“Voto Bindjen tënde më 30 qershor! Ka vetëm një mënyrë për ta shprehur refuzimin tënd për këtë qeveri. Për të marrë hak ndaj korrupsionit, arrogancës dhe karshillëkut të “Rilindjes”. Ka vetëm një mundësi për ta shprehur mospranimin tënd ndaj kësaj politike të shëmtuar sherresh dhe pazaresh të pista, ku të njëjtët personazhe të konsumuar, veçse ndërrojnë rolet prej 30 vjetësh. Mos e shiko atdheun me syzet e atyre që ta paraqesin si parajsë, vetëm se ata i kanë hipur kalit të pushtetit, por, as atyre të tjerëve, që thonë se jemi në skëterrë, vetëm sepse ata kanë zbritur nga kali. Shqipëria normale nuk ka asnjë lidhje me thirrjet dhe kërcënimet e tyre. Ka vetëm një mundësi që të mos e presësh nga qielli drejtësinë e munguar dhe ndryshimin”, shkruan ai.

Në vijim ai thekson se shqiptarët nuk duhet t’i binden atyre, “që i ftojnë për të shkuar në një festë me lugë të zbrazët dhe, as të tjerëve që të ndjellin t’i vesh flakën shtëpisë tënde”.

“Secili e bën për hallin e vet, që nuk ka asnjë lidhje me tëndin. Ka vetëm një mënyrë për t’i ndëshkuar ata që e kanë shkaktuar; në mes të kësaj marrëzie mëkatarësh, ndiq zërin e ftohtë të arsyes. Ne nuk kemi asnjë përgjegjësi për sa po ndodh, por përmes teje duam të marrim të gjitha përgjegjësitë për një të ardhme tjetër për Shqipërinë. Voto BINDJEN tënde më 30 qershor”, shprehet ai.

-----