Ballina Lajme nacionale A do të jetë kandidat për kryetar të LDK-së, flet Arban Abrashi

A do të jetë kandidat për kryetar të LDK-së, flet Arban Abrashi

17
SHPËRNDAJE

Lidhja Demokratike e Kosovës këtë të shtunë do ta mbaj Kuvendin e saj Zgjedhor.

Një nga emrat e shumtë të përfolur për kryetarin e LDK-së, që pritet të zgjedhet më 3 gusht, ka qenë edhe Arban Abrashi.

Por, ky i fundit, që është edhe anëtar i Kryesisë së kësaj partie e ka konfirmuar për Klan Kosovën se nuk do të kandidojë për pozitën e të parit të Lidhjes Demokratike të Kosovës.

“Jo, jo – nuk e kam menduar këtë punë. Jam anëtar i Kryesisë”.

Abrashi këto komente i ka bërë në një intervistë për Klan Kosovën pak para se të futet në mbledhjen e Kryesisë së LDK-së.

Ai ka thënë se kjo mbledhje pritet të definojë të gjitha çështjet përgatitore për mbajtjen e Kuvendit Zgjedhor të shtunën.

“Tani, edhe opinioni është në dijeni se Kuvendin Zgjedhor e kemi shumë afër, të shtunën. Mbledhja e Kryesisë sot e definon agjendën, rregulloren dhe çështjet e tjera protokollare përgatitore për këtë kuvend”.

“Është një mbledhje që i paraprin Kuvendit Zgjedhor në mënyrë që të shkojë sa më mirë”.

Por, me çfarë procedurash Lidhja Demokratike e Kosovë pritet ta zgjedhë kryetarin e saj?

“Ky është Kuvend Zgjedhor dhe nuk lejon që të ndryshohet statuti i LDK-së ku është e rregulluar se si është procedura zgjedhore”.

“Për momentin, duhet ta respektojmë këtë statut që e kemi dhe rregulloren e punës të Kuvendit Zgjedhor. Janë dokumente që janë të aprovuara tani e disa vite dhe Kuvendi i fundit Zgjedhor e ka pasë po të njëjtën rregullore”.

“LDK-ja vazhdon me atë dhe nuk ka mundësi të ndryshohet”.

Abrashi ka deklaruar se kandidatët që e synojnë udhëheqjen e LDK-së do të merren vesh të shtunën.

“Janë përmendur një numër i madh i kandidaturave që janë shpallë nga vet kandidatët dhe disa të tjerë kanë propozuar emra të tjerë. E mira është që nuk është folur personalisht nga ata, po disa edhe kanë shprehur gatishmëri që të udhëheqin proceset që është mirë për LDK-në dhe vendin”.

“Procedura është e qartë që në Kuvend paraqiten kandidaturat, pra të shtunën do të kemi mundësi që të shohim se cilat janë me të vërtetë ato kandidatura dhe nëse e marrin besimin të futen në garë”.

-----