Franca nis hetimet ndaj Apple
12:12 | 10 Janar 2018

Prokuroria e Parisit ka shënjestruar Apple me një hetim për “ngadalësim të planifikuar” të modeleve të vjetra të celulareve iPhone.

Ligjet franceze në fuqi e konsiderojnë krim shkurtimin e jetës së një produkti me qëllimin që të shtyhen blerësit drejt zëvendësimit të tij. Gjiganti amerikan i teknologjisë e pranoi në muajin dhjetor se modelet e vjetra të iPhonet ishin ngadalësuar qëllimisht përmes përditësimit të softuerëve të tyre, por këmbënguli se një hap i tillë ishte hedhur nisur nga fakti që performanca e baterive të aparateve në fjalë, zvogëlohej ndjeshëm me kalimin e kohës, transmeton tch. Hetimi i drejtuar nga Agjencia e Mbrojtjes së Konsumatorit pranë ministrisë franceze të Ekonomisë pason padinë e depozituar një muaj më parë nga grupi-pro konsumatorit Stop Planned Obsolescence, Hop. Grupi thotë se Franca është vendi i tretë që heton Apple pas Izraelit dhe Shteteve të Bashkuara, dhe i vetmi në të cilin kjo shkelje përbën krim. Ndëshkimi mund të përfshijë deri në 5% të xhiros vjetore ose edhe dënim me burg. Hop është i bindur se kompania amerikane e ka ngadalësuar qëllimisht performancën e modeleve iPhone përmes një përditësimi të bërë softuerëve, koha e të cilit përkon, siç vëren organizata, me hedhjen në treg të modelit të ri iPhone8.
Aurela Hoxha