Der Spiegel: Urrejtja ndaj azilkërkuesve, helmon Gjermaninë

0

Sulmet ndaj qendrave të akomodimit të azilkërkuesve janë rritur ndjeshëm në Gjermani. Sipas Ministrisë së Brendshme gjermane, vetëm sivjet ka pasur 173 të tilla.

20150730135313210620

Mbrëmjen e së hënës, më shumë se 2000 vetë marshuan në rrugët e Dresdenit në mbështetje të lëvizjes “Pegida”, lëvizje që lufton kundër “islamizimit të Perëndimit” e që tërheq sa përkrahës të ekstremit të djathtë, ashtu edhe njerëz të thjeshtë, të cilët emigracionit i kundërvihen vetëm sepse u druhen pasojave të tij.

Sulmet dhe protestat e shqetësojnë pjesën dërrmuese të gjermanëve, mjaft nga të cilët ndajnë bindjen se është detyrë e vendeve të pasura të ndihmojnë refugjatët. Të tjerë e shohin emigracionin si zgjidhje të mundshme të vjetërimit demografik të vendit apo nevojës për krah pune të specializuar. Por, mbi të gjitha, në një vend ku e kaluara ende e njollos të tashmen, çdo manifestim i ndjenjave raciste shkakton trazim të thellë.

Ministri i Drejtësisë, Heiko Maas, foli në emër të shumë bashkëkombasve të tij kur tha se “nuk ka vend në Gjermani për ksenofobinë”. “Der Spiegel” kishte fotografinë e një grupi refugjatësh në faqen e saj të parë, të shoqëruar me titullin: “Urrejtja ndaj azilkërkuesve po e helmon Gjermaninë”.

Atmosfera në vend është ndezur dhe politikanët janë përfshirë prej muajsh tashmë në një debat që vërtitet rreth këtyre dy pyetjeve: e para, përse duhet paguar për refugjatët që vërshojnë në Gjermani? Dhe pyetja tjetër: a ka ndonjë mënyrë për ta reduktuar numrin e tyre?

Qeveria federale gjermane pranoi së fundi t’u akordojë landeve 1 milion euro në mënyrë që t’i bëjnë ballë faturës gjithmonë e më të lartë të emigracionit. Për kryeministrin e Bavarisë, një shumë e tillë nuk ishte e mjaftueshme. Horst Seehofer, kryetar i CSU-së, partia simotër e konservatorëve të Angela Merkelit, është njeriu që qëndron pas planeve të shumëdebatuara për uljen e numrit të azilkërkuesve nga Shqipëria, Kosova dhe Mali i Zi.

Në muajin dhjetor, Berlini shpalli Serbinë, Bosnje-Hercegovinën dhe Maqedoninë vende të origjinës së sigurt, çka e bën më të lehtë refuzimin e azilkërkuesve prej këtyre shteteve. Me numrin e refugjatëve kosovarë, shqiptarë e malazezë të rritur në nivelin 500%, nuk është çudi që mjaft politikanë gjermanë janë treguar të gatshëm t’i shtojnë kësaj liste edhe vendin tonë e Kosovën.

Shpërndaje në rrjetet sociale.

Comments are closed.

Facebook Auto Publish Powered By : XYZScripts.com