Prishtinë, 13 korrik – Jo të gjithë në Kosovë e refuzojnë kategorikisht shkëmbimin e territoreve me Serbinë. Nexhat Daci, kryetar i LDD-së në opozitë, ka thënë se shkëmbimi i veriut të Kosovës me Luginën e Preshevës, nuk bën të përjashtohet.
“Unë nuk e hedh poshtë. Është diçka që mund të diskutohet në një fazë të mëvonshme, atëherë kur jemi vërtet të pavarur. Dhe, kjo duhet të bëhet vetëm me dëshirë e pa shkaktuar tensione, por nuk e hedh poshtë si mundësi”, ka thënë Daci në një intervistë në emisionin Interaktiv në KTV.
Daci, me prejardhje nga Bujanoci, tash në Serbi, ka thënë se shqiptarët e Luginës së Preshevës gjithmonë e kanë bërë të qartë dëshirën e tyre për bashkim me Kosovën.